بكالوريوس اداره عامه كليه التقنية تخصص اداره مكتبية

السلام عليكم ورحمه الله وبركاته

كان نفسي اكتب هذي المدونه للي يبغى يعرف اي شي عن بكالوريوس اداره مكتبيه = ادارة عامة

الي تغير اسمه من بكالوريوس اداره مكتبيه إلى تخصص بكالوريوس ادارة عامه

طبعا بالدبلوم لازال اسمه اداره مكتبيه دبلوم

لكن للاسف كتبت هذي المدونه بعد تخرجي منها ب7 اشهر كان ودي اكتبها وانا في الكليه حتى ما انسى اي شي

بسم الله

اولا  بعد ما تخلص الدبلوم اكيد تفكر انك تكمل بكالوريوس لكن تواجهك مشاكل وانا راح اقولك المشاكل وكيف راح تحلها باذن الله 

انا كتبت هذي المدونه حتى انفع بها غيري لان انا حاولت ابحث عن الموضوع ولا حصلته ودخلنا بمشاكل ودوامات لكن اعاننا الله والحمد لله عديناها لكن ابي انت تعديها بدون مشاكل قدر الامكان

بعد ما تتخرج من الدبلوم اي كان تخصصك من كليات التقنية باذن الله راح افيدك في البدايه لكن في النهايه راح يخص التخصص نفسه اداره مكتبيه = اداره عامه

طريقه التقديم .. طبعا تدخل موقع المؤسسه وتقدم على بكالوريوس في مجال تخصصك ولكن عادي في البكالوريوس يدمجوا تخصصين بالدبلوم في تخصص واحد بالبكالوريوس مثلا ،  تخصص دبلوم اداره مكتبيه وتخصص دبلوم تسويق ، في البكالويوس دمجوهم باسم اداره عامة

فا الي دارس تسويق او اداره مكتبيه ماراح تفرق اذا كنت مقدم على بكالوريوس فا مافيه فرق ابد ابد

ثانيا بخصوص المعدل التراكمي راح ينعاد يعني معدلك في الدبلوم ماراح يكون له اي فايده طبعا الي جايب 3.75 هو نفسه الي جايب 5 من 5

في البكالوريوس راح ينعاد المعدل من جديد طبعا شروطهم موجوده قد تتحدث من سنه لسنه لذلك ادخل موقعهم وش وش شروطهم

طبعا من احد شروطهم اختبار ستيب انجليزي من موقع قياس ف لازم تختبر قبل ماتقدم بوقت طويل عشان ممكن ماتجيب المعدل الي يبونه فا يكون عندك محاوله ثانيه يمديك تجيبها وتقدم عليهم 

يعني لو فتحو باب التقديم فا مايمديك تختبر ستيب  بهالسرعه الا اذا حظك حلو لكن انصحك اذا عندك نيه انك تكمل بكالوريوس من الحين قدم على اختبار ستيب انجليزي فا انا ليش قلت ستيب لانه اسهل شي ستيب لازم تجيب 45 من 100 فا اذكر انا جبت 47 والحمد لله مشيت 

فا اكبر مشكله تواجه الطلاب هذا الاختبار هو سبب كل البلاوي لان فعلا بعض الناس مايعرف انجليزي ونفسه يكمل وواقف عظمه هالشرط بحلوقهم فا الله يعينك حاول مره ومرتين لين تجيب النسبه الي يبونها

بعد هالشي تقدر تقدم على بكالوريوس عن طريق موقعهم 

بعد ماتقدم وتنقبل فيه شرط اساسي اختبار معرفه نسيت اسمه لكن عباره عن اساله تخص تخصصك وغيره اختبار من 40 درجه ناسي كم جبت اتوقع 17 درجه او 20 لكن لهم شرط معدل نجاح في هالاختبار انا حديته بكمل درجه يعني 

معدلالي يبونه  لازم تجيبه نسيته لكن موجود بموقعهم وسهالات ان شاء الله طبعا عباره عن خيارات مافيه شي ينكتب كله خيارات

بعد ماتعدي هالشرط خلاص انت صرت مؤهل لانك تكمل عندهم يعني كملت جميع الشروط

لكن بعد الانتظار وعدينا جميع الشروط

جانا رفض !!!!!!!!!!!!!

السبب

مفاجئ!!!!!!!!!!

ان الشعبه لم تكتمل

يعني عندهم شرط من نفسهم ان الشعبه اي عدد الطلاب لازم يكون 16 طالب وفوق لين 20 طالب

طبعا بكالوريوس فيه بجميع المدن  فا كلن يقدم على المدينه الي هو فيها شي طبيعي لكن المشكله وين

ان مثلا الرياض المتقدمين 6 والمدينه 5 وحايل 4 وجده 7 و القصيم 7 و الدماج 10 والاحساء 6 

يعني كلهم ماكملوا 16 ولا في اي كليه !!!!!!!!!

فا هم يقولون معليش نرفضكم حاولو الترم الجاي

فا هنا فيه كميه غباء غير طبيعي وعدم طرح حل الا الحل الي يبونه هم الا وهو تعال ادرس ليلي يعني بيجبرني ادفع مبلغ وقدره ليش طيب ممكن انا ماعندي القدره ليش تحدني على اليلي ! بكالوريوس ليلي نفس تخصصي 

فا المفروض المفروض انه يكون فيه خيار بان يجمعوا جميع الطلاب في كليه وحده في احد المدن يعني يعطوننا خيار عالاقل اننا نقدم على مدينه اخرى عشان تكمل الشعبه !!

للاسف ماعندهم هالشي ربما هم مايبون يدرسون طلاب  ربما مستغلين هالثغره فا مايبون يتعبون انفسهم ويدرسون طلاب بكالوريوس 

فا  هل حنا وقفنا ؟ لا

وهنا نقطه مهمه مهمه جدا جدا

الحل الي سويناه 

راح احد الطلاب الي مقدمين في احد المدن وقال ابي جميع ارقام جوالات الطلاب المقدمين على تخصصي ابي برنت ابي اكلمهم يمكن عندهم قبول بان يجتمعوا كلهم في مدينه وحدهه عشان تفتح الشعبه

فا اخذ ارقام جوالات جميع الطلاب الي مقدمين على نفس التخصص من جميع المدن  في المملكه

وقال الي موافق انه يدرس في الكليه الفلانيه طبعا يعطيني موافقه ، عشان اضع اسمك من ضمن الموافقين واعطيهم عميد الكليه بانهم موافقين يدرسون في تلك المدينه مثلا القصيم  وهو فعلا الي حصل في كليه بريده بالقصيم فا جمعنا جميع ارقامهم واخذنا موافقتهم الي في حايل والرياض والمدينه وغيره وغيره وكلهم وافقوا انهم يدرسون في القصيم

والحمد لله صرنا 18 طالب

وتم فتح الشعبه بعد ما اخبرنا العميد وشؤون الطلاب طبعا فتحوا خيار بالموقع ان التقديم يكون بالقصيم وكلن حط القصيم وتمت الموافقه

طبعا تعديل منهم بعد ما اشعرنا الكليه بان يوجد لدينا 18 طالب وافقوا ونبي منكم  تفتحون بالموقع خيار انه ( الرغبه ببريده ) عشان تكتمل الشعبه

بعد مااكتملت 

باقي شرط الا وهو المقابله الشخصيه سهالات مقابله عاديه بيسالك اساله مثلا

ليش تبي تكمل بكالوريوس ؟

وش هدفك ؟

وش اسمك ؟ ههه 

بيشوف انت طبيعي ولا لا  فقط

طبعا كان تخصصنا اسمه اداره مكتبيه وحولوه الى اداره عامه عشان يكون معتمد في الخدمه المدنيه لان

لان لا يوجد تخصص بكالوريوس اداره مكتبيه في الخدمه المدنيه ـ، نعم يوجد دبلوم اداره مكتبيه لكن بكالوريوس اداره مكتبيه لا

فا تم التحويل لاداره عامه

والحمد لله خلصناه بسنتين طبعا بدون تدريب تعاوني لا يوجد تدريب تعاوني بالبكالوريوس قد يكون اختلف في السنين القادمه لكن حاليا لايوجد

راح اعرض لكم باذن الله السجل التدريبي للبكالوريس اداره عامه يعني عشان تطلع عليه والشهاده طبعا للي يبغاها يتواصل معي شخصيا

طبعا الي بيدرس ليلي فيه امكانيه بدون اختبار ستيب ، يبون فلوس اهم شي هههه

طبعا اليلي نفس النهاري بالشهاده مافيه فرق ابد ابد ، حاليا عاد بالسنين القادمه الله اعلم

طبعا اليلي الي بيدرس على خبري نفس تخصص اداره عامه بكالوريوس قرابه 45 الف  كامل جميع المبلغ طبعا عندهم اقساط تدفع

عموما اي سؤال لاي طالب باذن الله راح افيده انا والله اكتب هالموضوع عشان ابي  اكسب ثواب من الله ولا انا قادر اني ما اكتبه ولا يهمني تخرجت ولا يهمني اي احد فا انا ابي الخير للجميع مشيا مع حديث الرسول اللهم صل وسلم عليه حب 

((لا يؤمن أحدكم حتى يحب لأخيه ما يحب لنفسه))

بخصوص الي يسهل عن سهولتها وصعوبتها

قسم بالله اسهل من شرب الماء لكن يبيلها عزيمه ( الدراسه عربي بعربي ) كنك دارس دبلوم مافيه انجليزي  الا مواد الانجليزي وكله مادتين بالبكالوريوس كلها يعني ونفس نظام الدبلوم بالضبط وبما انك عندك النيه انك تكمل بكالوريوس فا تطمن بتكون سهله عندك

ايهم اصعب دبلوم ولا بكالوريوس ؟ طبعا بكالوريبوس اصعب واتحفظ على كلمه اصعب لانه سهل لكن ليس اسهل من الدبلوم

راح يزعجونك المدربين انتم بكالوريوس وانتم بكالوريوس ههه

وفيه نقطه ثانيه خارج الموضوع ترا فيه بكالوريوس في كليه المدربين وهذي الكليه في الرياض فقط 

هذي من احد شروطهم  اختبار ستيب  او انك تكون جايب معدل طيب في دوره اللغه الانجليزيه المكثقه الي من قبلهم

عشان مايصير لبس ترا فيه كليه التقنيه بالرياض عاديه هي وفيه كليه المدربين بالرياض فا لاتلخبط بينهم اذا انت بالرياض

بس عموما بشكل عام سهل جدا الدراسه في كليات التقنيه وسلس ومتعه اسال الله ان يوفق الجميع

اكيد اني نسيت اشياء كثيره بسبب اني ما كتبت الموضوع الا بعد تخرجي بفتره لكن اذا في اي سؤال راح اجاوبه واعرضه هنا من ضمن الاساله الي جاتني وجاوبت عليها عشان تكون المعرفه للجميع

وعلى فكره كل الي اعرفهم ولي تواصل معهم بعد تخرجي توظفوا بوظايف حكوميه ومن بينهم انا

الشهاده ماهي مطلوبه نوعا ما لكن تأهلك وتدخلك للوظايف الحكوميه الي تطلب شهادة بكالوريوس

فا جميع اخوياي لو لا الله ثم شهادة البكالوريوس ماقدرنا نسجل اصلا او ندخل المقابله الشخصيه

فا الشهادة هي سبب بعد الله انها دخلتني المقابله الشخصيه فا بعد المقابله هو انت وقدراتك وكيف تقنع الي قدامك وهذا كله سهل جدا تتعلمه من قوقل واليوتيوب كيف تجتاز المقابله الشخصيه 

وعلى فكره انا انقبلت من وظيفتين حكوميتين واستخرت واخترت الي اختاره لي الله فا الحمد لله اني كملت بكالوريوس واتمنى الجميع يكمل بكالوريوس لان فعلا هو يعتبر سلاح تتسلح فيه لمواجهة التحديات

بعد ماتتخرج مو مهم انك تنقبل على طول لاتحزن انا اول ماتخرجت من الدبلوم قدمت على اللغه الانجليزيه المكثقه التابعه للتقنيه 6 شهور

ثم حصلت لي وظيفه شركه وجلست 7 شهور ثم قدمت على البكالوريوس وانقبلت وتركت الوظيفه وكملت ويوم توظفت صار راتبي دبل راتبي الي كنت استلمه بالشركه وزيادة بعد توفيق الله

على فكره سمعت ان الخطه الدراسيه تغيرت بعض المواد عن الي درستها انا فا يمكن حذفوا 4 مواد وزادوا 4 مواد فا الخطه موجوده بموقعهم بمكان اي احد يطلع عليها الي هي خاصه بالإدارة العامة

اخيرا راح اكتب رقم جوالي عمودي عشان مايطلع ببحث قوقل :) ههه فا اي احد يحتاج سؤال ان شاء الله اني بفيده

0

5

4

1

0

7

7

1

1

1